Боловсролын зээлийн сангаас зээл авч суралцагчдын нэр зарлагдсанаас хойш ард түмний нүд ёстой л орой дээрээ гарч байна. Төрийн эрх баригчид, дээд албан тушаалтнууд өөрсдийн хүүхдүүдээ хэдэн арван мянган долларын сургуульд үнэгүй сургасныг нь хараад төрд итгэх итгэл үнэмшлээ бүр алдаж орхив. Энэхүү зээлд нэлээд олон УИХ-ын гишүүн, гишүүн аснууд холбогдсон. Түүний дотор УИХ-ын гишүүн асан Ц.Сэдванчиг бүр хоёрын хоёр хүүгээ сургасан ч зээлээ төлөөгүй байх юм. Тэдний зээл нийлээд 64 мянган доллар. Одоогийн ханшаар бол 220,032,000 болж байх юм. Жирийн ард иргэд хоногийн хоолны арав, хорин мянган төгрөгийн төлөө өдөр шөнөгүй зүтгэж байхад тэдний амьдралыг сайжруулах үүрэгтэй гишүүн хүн өөрсдийн хөвгүүдээ улсын мөнгөөр сургаад, эцэст нь зээлээ улсад ч төлсөнгүй. Зөвхөн хүү С.Цэрэндашийн тухай ярихад тэрээр 2015 онд Люксембургийн Их Сургуульд суралцахаар 32,000 долларын зээл авчээ. Түүнийг 2020 онд Санхүүгийн зохицуулах хорооны Үнэт цаасны газрын даргаар ажиллаж байсныг мэдэх биз ээ. Дөнгөж 30 настай залуу улсын нэлээн том албыг хашиж байсан гэхээр азтай ч шиг, одтой ч шиг.
© 2022 Tusgaar.mn – All rights reserved.