М-Си-Эс Кока-Кола ХХК-ийн Гүйцэтгэх захирал Л.Мягмаржав Америкт суралцахаар зээлсэн 34,708 ам.доллараа ТЭГЛҮҮЛЖЭЭ

Арай ч үгүй байлгүй дээ гэхээр манай бизнесмэн, улс төрийн томчууд үнэхээр л эрээ цээр, ичих булчирхайгаа алдсан байх нь тун харамсалтай. Боловсролын зээлийн санг ухаад байвал хэний ч нэр гарч ирж магадгүй бололтой. Жишээлбэл, улсад хамгийн өндөр татвар төлдөг, хамгийн их ашиг олдог гэх тодотголтой үндэсний групп болох М-Си-Эс Holding-ийн Кока-Кола ХХК-ийн гүйцэтгэх захирал Лувсандашийн Мягмаржав 1998 онд АНУ-ын Брижпортын их сургуульд суралцахаар төрөөс 34,708 долларын зээл авчээ. Түүний намтар дээр 1998-2000 онд АНУ-ын Брижпортын их сургуульд суралцсан гэсэн мэдээлэл байх авч чухам ямар мэргэжлээр суралцсан нь тодорхойгүй байгаа юм. Эдийн засагч гэгддэг эл эрхэм 1992-1995 онд МУИС-ийн Эдийн засгийн сургуульд сурснаар тухайн мэргэжлийг эзэмшсэн гэдэг. Хамгийн сонин нь татвар төлөгчдийн 100 гаруй сая төгрөгөөр гадаадад боловсрол эзэмшсэн Л.Мягмаржав эрхэм БШУ-ны сайдын 2013 оны 5-р сарын 22-ны өдрийн А/185 тоот тушаалаар зээлээ “чөлөөлүүлсэн” байна. Тухайн үед мөн л олон хүний өрийг тэглэсэн гэгдээд байгаа Лу.Гантөмөр Боловсролын сайдаар ажиллаж байжээ.